រាជធានីភ្នំពេញ ៖ ប្រធានរដ្ឋសភា នៃប្រទេសថៃ បានគូសបញ្ជាក់ថា នឹងជួយលើកកម្ពស់សិទ្ធិពលករខ្មែរ ដែលកំពុងធ្វើការនៅប្រទេសថៃ និងមើលថែពួកគេនិងគ្រួសារ ដូចជាជាពលករថៃដែរ ដោយកូនចៅរបស់ពលករទាំងនោះ…
រាជធានីភ្នំពេញ ៖ ប្រធានរដ្ឋសភា នៃប្រទេសថៃ បានគូសបញ្ជាក់ថា នឹងជួយលើកកម្ពស់សិទ្ធិពលករខ្មែរ ដែលកំពុងធ្វើការនៅប្រទេសថៃ និងមើលថែពួកគេនិងគ្រួសារ ដូចជាជាពលករថៃដែរ ដោយកូនចៅរបស់ពលករទាំងនោះ មានសិទ្ធិបានចូលសិក្សា រៀនសូត្រ ដើម្បីក្លាយជាទំពាំងស្នងឫស្សី នាពេលអនាគតដែរ ។
ការលើកឡើងរបស់ឯកឧត្តម វ៉ាន់មូហាម៉ាត់ណ មៈថា ប្រធានរដ្ឋសភា នៃព្រះរាជាណាចក្រថៃ បានចូលជួបសម្តែងការគួរសម និងជំនួបពិភាក្សាទ្វេភាគី ជាមួយឯកឧត្តមបណ្ឌិត ជាមយៀប ប្រធានរដ្ឋសភាស្តីទី នៃព្រះរាជាណាចក្រកម្ពុជា នាព្រឹកថ្ងៃទី២១ ខែមីនា ឆ្នាំ២០២៤ នៅវិមានសន្តិភាព ។
ឯកឧត្ដមប្រធានរដ្ឋសភាថៃ បានលើកឡើងពីវឌ្ឍនភាព នៃទំនាក់ទំនង និងកិច្ចសហប្រតិបត្តិការទ្វេភាគី ដែលមានជាយូរលង់មកហើយ ក៏ដូចជាសមិទ្ធផលសំខាន់ៗ ស្តែងចេញពីទំនាក់ទំនងនេះ និងសង្ឃឹមយ៉ាងមុតមាំថា ទាំងស្ថាប័ននីតិប្បញ្ញត្តិ និងនីតិប្រតិបត្តិ នៃប្រទេសទាំងពីរ ដោយឯកឧត្ដមបញ្ជាក់ថា ថៃនិងកម្ពុជា គឺជាបងប្អូន។ ប្រទេសទាំងពីរ ជាអ្នកជិតខាងល្អ ជាមិត្តល្អ ដូចសុភាសិតបានលើកឡើងថា មានមិត្តល្អម្នាក់នៅជិត ប្រសើរជាងមានមិត្តល្អ១០នាក់ ដែលនៅឆ្ងាយ ។
ក្នុងជំនួបនោះដែរ ឯកឧត្ដមប្រធានរដ្ឋសភាថៃ ក៏បានសំណូមពរឱ្យរដ្ឋសភាប្រទេសទាំងពីរមានអនុស្សរណៈយោគយល់គ្នា ដូចរដ្ឋសភាកម្ពុជា មានជាមួយប្រទេសវៀតណាម និងប្រទេសផ្សេងៗទៀត ដើម្បីឱ្យកិច្ចសហប្រតិបត្តិការ នៃសភាប្រទេសទាំងពីកាន់តែល្អប្រសើរ និងគ្រប់ជ្រុងជ្រោយថែមទៀត។
ជាមួយគ្នានេះ ឯកឧត្ដម ក៏បានគោរពអញ្ជើញសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងគណៈប្រតិភូជាន់ខ្ពស់រដ្ឋសភាកម្ពុជា ទៅបំពេញទស្សកិច្ចនៅព្រះរាជាណាចក្រថៃ ដើម្បីមានឱកាសច្រើនថែមទៀត ក្នុងការពិភាក្សាគ្នា អំពីកិច្ចសហប្រតិបត្តិការសភា និងការពិចារណាទៅលើការចុះអនុស្សារណៈ រួមជាមួយគ្នា ។
ឯកឧត្ដមបានក៏លើកឡើងថា ឯកឧត្ដម នឹងជួយជំរុញអ្នកវិនិយោគថៃ ឱ្យមកបណ្ដាក់ទុនកាន់តែច្រើននៅកម្ពុជា ព្រមទាំងលើកកម្ពស់សិទ្ធពលករខ្មែរដែលកំពុងធ្វើការនៅប្រទេសថៃ និងមើលថែពួកគេ និងគ្រួសារ ដូចជាជាពលករថៃដែរ ដោយកូនចៅ របស់ពលករទាំងនោះ មានសិទ្ធិបានចូលសិក្សារៀនសូត្រ ដើម្បីក្លាយជាទំពាំងស្នងឫស្សី នាពេលអនាគតដែរ» ។
ចំណែកឯ ឧត្ដមកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្ដីទី បានបញ្ជាក់ថា ឆ្នាំក្រោយនេះ ជាខួបលើកទី៧៥ឆ្នាំ នៃចំណងការទូតរបស់ប្រទេសទាំង២ ក្នុងន័យនេះ ការទូតសភា គឺដើរតួនាទីសំខាន់ ក្នុងការជំរុញភាពជាដៃគូយុទ្ធសាស្ត្រឱ្យកាន់តែស៊ីជម្រៅថែមទៀត ។
ឯកឧត្ដមកិត្តិសេដ្ឋាបណ្ឌិត ប្រធានរដ្ឋសភាស្ដីទី ក៏បានគូសបញ្ជាក់បន្ថែម អំពីកិច្ចសហប្រតិបត្តិការទ្វេភាគី ដែលមានលក្ខណៈពហុវិស័យ និងច្រើនកម្រិត ដោយមានកិច្ចសហប្រតិបត្តិការល្អពីគ្រប់ភាគីពាក់ព័ន្ធទាំងក្របខណ្ឌរដ្ឋ និងរដ្ឋ (តាំងពីថ្នាក់ជាតិដល់ថ្នាក់មូលដ្ឋាន) ក្របខណ្ឌសភា និងសភា ធុរកិច្ចនិងធុរកិច្ច គណបក្សនយោបាយ និងគណបក្សនយោបាយ និងរវាង ប្រជាជន និងប្រជាជន ៕
ចែករំលែកព័តមាននេះ